ایم ڈی کیٹ فیس میں 80 فیصد اضافے کی خبروں کی تردید، امتحان 5 اکتوبر کو ہوگا: پی ایم ڈی سی

اسلام آباد: پاکستان میڈیکل اینڈ ڈینٹل کونسل (پی ایم ڈی سی) نے ہفتے کے روز ایم ڈی کیٹ داخلہ ٹیسٹ کی فیس میں 80 فیصد اضافے کی خبروں کو "غلط فہمی" قرار دیتے ہوئے سختی سے تردید کی ہے اور اعلان کیا ہے کہ میڈیکل اینڈ ڈینٹل کالجز ایڈمیشن ٹیسٹ (ایم ڈی کیٹ) رواں سال 5 اکتوبر 2025 کو منعقد ہوگا۔پی ایم ڈی سی نے ایک پریس ریلیز میں وضاحت کی کہ 2024 میں ایم ڈی کیٹ فیس 8,000 روپے تھی، جو 2025 کے لیے 9,000 روپے مقرر کی گئی ہے — یعنی صرف 12.5 فیصد اضافہ، جو انتظامی اور امتحانی اخراجات میں اضافے کی وجہ سے کیا گیا۔

بیان کے مطابق، امتحان کا انعقاد وفاقی و صوبائی حکومتوں کی نامزد کردہ جامعات کریں گی، جب کہ پی ایم ڈی سی بطور ریگولیٹری ادارہ، تمام اسٹیک ہولڈرز کے ساتھ مشاورت سے یکساں نصاب تیار کر چکا ہے۔ ساتھ ہی ایک سوالاتی بینک بھی تیار کیا گیا ہے تاکہ امتحان میں شفافیت اور معیار کو یقینی بنایا جا سکے۔
پی ایم ڈی سی نے کہا کہ امتحان کاغذ پر مبنی (Paper-Based) ہوگا، انگریزی زبان میں لیا جائے گا، اور اس میں 180 ایم سی کیو سوالات ہوں گے، جن میں کوئی منفی مارکنگ نہیں کی جائے گی۔ سوالات کی تقسیم درج ذیل ہوگی:
حیاتیات (Biology): 81
کیمیا (Chemistry): 45
طبیعیات (Physics): 36
انگریزی: 9
منطقی استدلال: 9

رجسٹریشن کا عمل mdcat.pmdc.pk پر شروع ہو چکا ہے اور 25 اگست 2025 تک جاری رہے گا۔ لیٹ فیس کے ساتھ رجسٹریشن کی آخری تاریخ 1 ستمبر 2025 ہے۔
امتحانات ان اداروں کے تحت منعقد ہوں گے:پنجاب: یونیورسٹی آف ہیلتھ سائنسز، لاہورسندھ: سکھر آئی بی اے یونیورسٹیخیبر پختونخوا: خیبر میڈیکل یونیورسٹی، پشاوربلوچستان: بولان یونیورسٹی، کوئٹہ وفاقی دارالحکومت، آزاد کشمیر، جی بی، سعودی عرب: شہید ذوالفقار علی بھٹو میڈیکل یونیورسٹی، اسلام آباد
پی ایم ڈی سی نے اس بات پر زور دیا کہ درخواست فارم احتیاط سے پُر کیا جائے، بصورتِ دیگر سسٹم درخواست مسترد کر دے گا۔
قبل ازیں، پی ایم ڈی سی کے صوبہ وار امتحانی نظام کے فیصلے پر تنازع کھڑا ہوا تھا جسے پاکستان میڈیکل ایسوسی ایشن (پی ایم اے) نے "تعلیم تک رسائی محدود کرنے والا" قرار دیتے ہوئے مسترد کر دیا تھا۔