حافظ آباد سیکرٹری پنجاب ایمرجنسی سروسز ڈیپارٹمنٹ ڈاکٹر رضوان نصیرکی خصوصی ہدایت پر پنجاب ایمرجنسی سروس (ریسکیو 1122) حافظ آباد کی جانب سے "عالمی دن برائے ڈوبنے سے بچاؤ" کے سلسلے میں ایک سیمینار اور آگاہی واک کا انعقاد کیا گیا۔
تقریب کی قیادت ڈسٹرکٹ ایمرجنسی آفیسر انجینئر عدنان نواز نے کی۔ اس موقع پر ریسکیو سیفٹی افسر ہمائیوں، ریسکیو افسران، ریسکیورز، ریسکیو اسکاؤٹس، طلبہ و طالبات اور دیگر معزز شہریوں کی بڑی تعداد نے شرکت کی۔
سیمینار سے خطاب کرتے ہوئے انجینئر عدنان نواز نے کہا کہ ترقی پذیر ممالک میں ڈوبنے کے واقعات ایک سنگین مسئلہ بن چکے ہیں، اور اکثر لوگ پانی کے بہاؤ کو کم سمجھ کر جان لیوا حادثات کا شکار ہو جاتے ہیں۔ انہوں نے کہا کہ فزکس کے اصولوں کے مطابق صرف 6 انچ گہرا سیلابی پانی بھی چھوٹی گاڑی کو بہا سکتا ہے، اور تحقیق سے یہ بات سامنے آئی ہے کہ سیلابی ریلوں میں گاڑیوں کے اندر موجود افراد کی اموات کی شرح باہر موجود افراد سے کہیں زیادہ ہے۔
انہوں نے شہریوں پر زور دیا کہ وہ بارشوں، سیلابی پانی، گلیوں میں کھڑے جوہڑوں، اور دیگر خطرناک مقامات پر بچوں، بزرگوں اور خود بھی غیر ضروری طور پر جانے سے گریز کریں۔ اگر مجبوری میں گزرنا ضروری ہو تو بانس یا لکڑی کی چھڑی ساتھ رکھیں، اور اسے پانی میں ڈپ کرتے ہوئے قطار کی صورت میں احتیاط سے آگے بڑھیں تاکہ گہرے پانی یا کھلے گٹر کی موجودگی کا اندازہ لگایا جا سکے۔
