چارسدہ: آر پی او مردان ریجن جواد قمر (ستارہ شجاعت، کیو پی ایم) کا ضلع چارسدہ کا دورہ ۔ پولیس لائن میں دربار، شہداء کو خراجِ عقیدت، ڈی آر سی ممبران اور افسران سے تفصیلی ملاقاتیں

ریجنل پولیس آفیسر مردان جواد قمر نے آج ضلع چارسدہ کا دورہ کیا۔ دورے کا آغاز پولیس ہیڈکوارٹرز چارسدہ میں چاق و چوبند پولیس دستے کی جانب سے سلامی سے ہوا، جس کے بعد یادگارِ شہداء پر حاضری دی گئی اور پھولوں کی چادر چڑھائی گئی۔ڈسٹرکٹ پولیس آفیسر چارسدہ محمد وقاص خان نے معزز مہمان کا پرتپاک استقبال کیا۔دورے کے دوران آر پی او جواد قمر نے ڈی آر سی کے ممبران سے ملاقات کی، جہاں ڈی پی او چارسدہ نے ڈی آر سی کی کارکردگی پر بریفنگ دی۔ آر پی او نے ڈی آر سی ممبران کی خدمات کو سراہتے ہوئے انہیں پولیس اور عوام کے درمیان ایک مضبوط پل قرار دیا۔بعد ازاں سرکل افسران کے ساتھ اجلاس منعقد ہوا، جس میں ڈی پی او چارسدہ نے ضلع بھر میں جرائم کی صورتحال اور پولیس کی حالیہ کارکردگی پر تفصیلی بریفنگ دی۔

آر پی او نے پولیس سہولت مرکز کا دورہ کیا، جہاں انہوں نے شہریوں سے ملاقات کی اور فراہم کردہ سہولیات کا جائزہ لیا۔ بعد ازاں، وہ زیر تعمیر نئی پولیس لائن کا دورہ کرنے بھی گئے اور تعمیراتی کاموں کا معائنہ کیا۔پولیس لائن چارسدہ میں ایک پولیس دربار کا انعقاد بھی کیا گیا۔ دربار کا آغاز تلاوتِ قرآن پاک سے ہوا۔ ڈی پی او محمد وقاص خان نے اپنے خطاب میں آر پی او جواد

 قمر کا شکریہ ادا کرتے ہوئے ان کی چارسدہ آمد کو اعزاز قرار دیا۔ انہوں نے کہا کہ آر پی او صاحب کی موجودگی نہ صرف پولیس فورس کے لیے حوصلہ افزا ہے بلکہ اہلکاروں کے لیے اعتماد کی علامت بھی ہے۔ڈی پی او چارسدہ نے دربار میں موجود اہلکاروں سے مخاطب ہو کر ان کی خدمات کو سراہا اور کہا کہ قانون کی عملداری اور عوامی خدمت میں ہر سپاہی کا کردار نہایت اہم ہے۔

اپنے خطاب میں آر پی او مردان جواد قمر نے خیبرپختونخوا پولیس کی قربانیوں کو خراجِ تحسین پیش کیا اور شہداء کے لواحقین کی فلاح کے لیے اقدامات کو ناگزیر قرار دیا۔ انہوں نے تھانہ جات اور چوکیات کے انفراسٹرکچر، پولیس ویلفیئر، اور اہلکاروں کی سہولیات میں مزید بہتری پر زور دیا۔
دربار کے بعد آر پی او مردان نے پولیس لائن کے مختلف شعبہ جات کا تفصیلی معائنہ کیا، جن میں کوت، مس  اور اہلکاروں کی رہائشی بیرکیں شامل تھیں۔ بعد ازاں، انہوں نے تھانہ سٹی چارسدہ کا دورہ کیا، جہاں سائلین سے براہِ راست ملاقات کر کے فوری احکامات جاری کیے۔
دورے کے اختتام پر آر پی او مردان نے سیف سٹی پراجیکٹ کے تحت قائم کمانڈ اینڈ کنٹرول سینٹر کا بھی معائنہ کیا۔ اس موقع پر ڈی پی او چارسدہ نے انہیں منصوبے پر تفصیلی بریفنگ دی۔ آر پی او نے جاری کام کو سراہتے ہوئے جدید نگرانی کے نظام کو ایک اہم سنگِ میل قرار دیا۔